Am lezdn Wochnend wors rechd schei draußn und wer waas wei lang ma no umanandergnaddern kon, befur der Winda kummd. Bei uns hams am erschdn Advend ah nu dei Gschäfda offm ghabd, also bin iech mid meiner Fraa midn Schlümbfla aafs eikaafm gfohrn. Is Goggo wor schee brav in dera Barglüggn vur dem Gschäfd gsdandn und dei Leud hom se über des scheine Audola gfreid.

Wei mir ferdi worn mid eikaafm bin iech aus meiner Barglüggn raus und an ahner ganzn Reiha andere bargde Audos endlang gfohrn. Dou schreid mei Fraa "bass aaf, dou fährd jemand aus dera Barglüggn raus, der siechd uns fei ned!!" Zerschd hob iech gor ned gwussd wos mei Fraa will und nou wors zum bremsn scho zu sbäd und iech bin draf auf dei Hubm und hob gleichzeidi aafs Gas drüggd. Des andere Audo is fei ned sdehbliem, na, dei is einfach rüggwärds weider gfohrn. Wär mei Schlümbfla an ahnzichn Zendimeder breider gwesen nou häd iech an scheener Gnidder im Lagg drinna ghobd. Des is grod numal goud ganger. Mei lieber wor des gnabb! Nouch dem se mei Herzfrequens widder normalisierd houd und mei Fraa zum schimbfm aafghörd houd simmer aaf a scheine Dur ins Bengerdzdohl gfohrn.

Des wor dei Gschichd vom erschdn Advend - Glügg ghabt!
05.12.2008

A boor Wochng is her, dou wor bei uns in Herschbrugg a Drembalasmargd. Ihr wissd scho wou ma sei ganz Glumb des ma daham rumliegn houd verscherbln ko. Mei Fraa is mid meiner Dochder also zu dem Margd hi ganger, obwohl mei Fraa sochd, wos will iech denn mid dem Graffl vo dena andern Laid, wer was wei lang des scho ircherdswo rumliechd - igidd, nah des moch iech ned! Na ja, wies Lebm hald so sbilld, vo meim Goggovirus is hald aah scho a weng infizierd, is hald an su an Schdand hie, wous Modellaudola gehm houd. Nouch irchad an glaaner Goggo houds ausschau ghaldn. Aaf amol houd mei Dochder gsochd, Mama schau amol dou schdeid doch a Bolizeigoggo rum! Houd doch mei Fraa ah no mid dem Menschn hinderm Schdand is handln oh gfanger, obwohl sie doch des alde Glumb vo dei andern gor ned mooch, und houd mir a richdigs Schnebbla mid hambrochd. Iech häd gern dabei sei mögn wei`s dem des Goggo abgluxd houd. Doll!! und iech hob etz a scheens Audola in meina Vidrina drinner steih! Middlererwail houd se dou scho des aahne oder andere Audola dazougselld. Schauds eich ner des Bildla ooh!

Also dann bis zu dera nexdn Gschichd!
Der Schlumbf-Baba aus Herschbrugg
22.10.2008

Des wor haid alles fasd aweng zvill. Goggo spuggd, Bsouch kummd und dei 16. Christopherus-Fohrd in Rollhufm is aah no. Aber erschd ahns nouchng andern.
Lezde Wochng wors, dou bin iech midn Schlumbf durch dei Herschbrugger Lande düsd. Middn drinna houda es bfobfern ohgfanger und houd gohr nemmer aafghärd. Iech hob des Goggo zerlechd. Zündkerzn brüfd, naie Schdegverbindunga an dei Zündschbuln gmachd, Vergaserdüsn greinichd und sou weider. Nix wors, is Schlümbfla houd immer no boggd. Dei neddn Leid im Goggo-Forum hob iech nou um Roud gfrouchd und aah greichd - aus Holland, ihr wissd scho, dou ganz waid ohm im Nordn ircherdwo dou, also ganz weid wech vo Frangn. Der Dennis houd gschriebm, iech mou dei kondakdlouse Zündanlach brüfm. Dou kännerd a Kobl am Lüfderroud ohgloffm sei, wos nadürli zu Zündaussedzern führd. Almechd der houd rechd, des wors und es Goggo is widder gloffm wei a Nähmaschinna - bis gesdern, Freidooch- dou houda widder gruggeld und spuggd der Schlumbf.

So, wos is etz widder??? Iech will doch umbedingd bei dera Rollhufner Ausfohrd dabei sei! Samsdooch Middoch solls losgeih (halba zwah, hob iech jedenfalls dengd!). In dera Freih hob iech a nu an Dermin beim Boda ghobd. Schnell ham edz und unders Goggo glechd. Bis Middooch mou iech ferdi sei und dei Verwandschfd kummd aah nu aaf an Schbrung vobei. Also nummol des Lüfderradl rou gmachd. Nix, des Kobl is goud. Dou fälld mir a Kobl an dera Zündspuln aaf, des wor vom Vurbesidzer eimfach mit an Klebeband isolierd. Dou schausd amol nouch... owei, des siechd ned goud aas. Dou schaua jo dei Drähdla raus. Also schnell an naia Drohd neizoogn, vursichdshalber doch dei Zündkezn dauschd und alles widder zammagschraubd.
So, etz hob iech mir a Dassn Kaffee vediend. Verwandschafd is aah scho dou und Zeid hob iech aah nu.

Nouch an Waaf mid dera Verwandschafd hob iech gmüdle mei Wergzeich zammabaggdund hob gsochd, iech gei nu aaf Brobefahrd ob alles geihd - dou schau iech nummal aaf den Blan vo dera Ausfaohrd - Almechd is mir haas worn. Dou geids ja scho um halba ahns lous und ned um halba zwah wei iech dengd hob. Etz oba schnell, iech will doch dou aah mied!! Babiere, Geld, Schlüssl zambaggd und lous geids nach Rollhufm. Dei Anfahrd nach Rollhufm wor hald glei dei Brobefohrd - gschwizd hob iech! Oba es iss alles goud ganga. Des Schlümbfla is gloffm und rechdzeidi wor iech aah nu dou, blous mein Fodo hob iech vo ladder louds miech aah mied daham vergessn!

Dei Ausfohrd wor doll und houd riesich Schbass gmacht. Dank schei an Alfred Gröschel für dei Organisadion...!!!

Bilder vo dem Ifend sin vom Jürgen: Bilder vom Jürgen
09.08.2008

Nouch dem Fodoschdress in Neuschdad bam 35. Glas- und Goggodreffm bin iech widder ham gfohrn in mei scheins Herschbrugg und bin daham glei no a scheine Rundn midn Schlumbf ins Bengerdzdool gfohrn. Scheins Wedder wor, des Modörla houd gschnurrd aaf aah mol fängd der Schlumbf nouch Escherbo zum schbuggn ah. Ja wos houd er denn der Glaane houb iech mir dengd. Es werd doch nix schlimms sei!? Des hörd se doch wei Zündaussedzer ooh. Iech bin also rechds naus gfohrn, wal er ja aah nimmer zuhgn houd, in Benzinhohn zoudrehd und hob dei Modorhaubm aafgmachd. Liechd dou ned der Zündkerznschdegger neber dro. Na dou koo der ja nimmer geih. Also den Kerznschdegger widder draf und weider geids.
Kaane fuchzich Meder späder bleibd ma der Modor widder schdei - glor, iech hab den Benzinhon ned widder aafdrehd! Danouch is fröhlich weider ganga bis aaf Rubbrechdschdegn naaf. Houd doch der Glaane widder es bfobfern oohgfangd. Widder der Kerznschdegger roo gfalln. Iech hob zwor a Werchzeich dabei ghobd obber an su an glaaner Schraubmzeicher für dei Feidern im Kerznschdegger drin hald ned. Wos dousd etz? Ah, dou laafm doch a boor Leid im Gardn rum und dei houb iech nouch an Schraubmzeicher gfrochd und aah an grichd. Obber a su eifach is des aah ned dei glaane Feider zum biegn, das dei aah widder häld. Kurz gsochd iech hobs ned hiegrichd. A halbe Schdund hob iech rumdogderd. Blödzlie kummd dou a Mooh ausn Haus raus und wolld se mei Goggo ahschauer. Den hob iech nacherdla gfrouchd ob er a weng an Lidzndrouhd houd. Houder ghabd und den hob iech nou um dei Zündkerzn ohm am Gwind rumgwiggld. Scho wor der Schdegger widder fesd und mei Bengerdzdoolrundn is weider ganger. Schei wenns immer widder su nedde Leid gibd dei an helfm.

Des wor edz mei Pfingsdgschichdla - schei ne!
12.05.2008

Heid wor a su a saublöder Dooch. Ned amol die zweide Dassn Kaffee houd mie wach gmachd. Uma Neuner häd iech miech scho wider hielegn könna! Iech glab des nennd ma Freijohrsmüdichkeid oba es nutzt ja nix dou moust durch und den ganzn Dooch im Büro erbern. Also iech hob miech hald den ganzn Dooch durchgschlebbd bis um halber sechsa. Aaf der Hamfohrd vom Gschäfd hob iech mir dengd des konns doch heid nonni gwesn sei! Dou is ma mei Schlümbfla eigfalln. Die Freijohrsmüdichkeid wor aaf ahn Schloch wech. Iech also hamkummer, umzuhgn, meim Schadz schnell a Bussi naafdriggd und naus in dei Garasch zum Goggo. Almechd wor des schei und endschbannend nooch a suam Dooch midn Schlümbfla in den Sunnerundergang zum fohrn! Leider hob iech mein Fodo daham glassn, sonsd häds aah nu a boor scheine Bilda zu meim Feierobmdausfluch gehm. Schei wors!

Ade bis zum nächsdn Mohl - Der Schlumbf-Baba.
23.04.2008

An ahn scheener Samsdoch im Februar anno 2008, dei Sunner houd gschiena obber kold wors no ganz schei, dou hob iech mein Schlumbf aus dera Garaschn raus und bin glei losgnadderd. Erschd amol rum um an Blogg, damid sich der Zwaadagder an dei frische Lufd gwöhnd und dann glei in Richdung Herschbrugg gfohrn. Mei Schlümbfla houd gnadderd und scheine blaue Wölgla hinder sich her zuhng. Iech wor mid meiner diggn Jaggn im meim Goggole ghoggd, dou schau iech in den Rüggschbiechl nei. Fährd dou ahner mit sein BMW hinder mir und houd es Verdegg offm. Der mou doch ned ganz richdi sei hob iech mir dengd. Jedenfalls mier wärs zu kold gwesn und meim Schlumbf wors aah nu kold. Na ja, glei an der erschdn Ambl hob iech sdeh bleim müssn, weil wecha dem roudn Lichdla und der BMW-Fohrer mid seim offna Verdeggla glei ganz dichd aafgfohrn, damidder mein Schlumbf aweng ohschauer ko. Ward ner, wenn dei Ambl auf Grün schald, dou werd iech dir scho zeign wos so in mir schdeggd houd se mei Schlumbf dengd. Dei Ambl springd also aaf Grün, iech den erschdn Gang nei - glagg - und draff afs Gas. Houd mei Schlumbf a grouse scheene blaue Wolgn ausgsdousn, weils ihm ja nu kold wor und dei houds diregd meim Hindermann ins offne Verdeggla neidriggd. Almechd den sichd ma ja gor nimmer und an scheener Absdand houd der blödzli eighaldn. Dou sigsd wos alles in su an Goggo drinschdeggd! Iech hob jednfalls rechd dreggerd glachd - des könnds eich ja dengn!

Also bis zur nexdn Gschichd - Euer Schlumbf-Baba
08.03.2008

Iech hoff Ihr könnds des lesn (und versteih nadürli) wenn ned schreibds a mail und iech werds aich übersedzn!

Grüße vom Schlumbf-Baba aus Herschbrugg!
23.02.2008